【娛樂人物】40億千金學跑步頓悟成功靠堅毅蔡頌思多謝發哥打氣 - 香港蘋果日報

digosipinmulu.blogspot.com

海產大王蔡繼有孫女、40億千金蔡頌思（Jocelyn）甫亮相今年「翻生」港姐面試，即被人踢爆背景頓成大熱，可惜最終因合約問題退選。蔡頌思為了參選積極喼弗，當中更跟「發哥」周潤發跑步，修身其次，最重要是領會到發哥的成就正是來自他對跑步的堅毅，明白成功非僥倖。

撰文：寶妮

蔡頌思日前在銅鑼灣接受《蘋果》訪問，提到最終因合約問題未能參選港姐，少許失望總是有的，回想最初因疫情改為網上面試，蔡頌思直言有不少問題：「燈光及鏡頭像數唔好都影響評判嘅觀感，所以初時我都擔心，改返真人面試先好啲。」佳麗面試過程不能透露，但蔡頌思指見評判時間很短，最難忘是知道要在電視城逗留全日，因此自己一早做足準備：「我帶咗兩件羽絨褸同一份減肥餐，但有啲佳麗冇咁好準備，結果我借咗一件褸畀一位佳麗，另外就畀咗餐中嘅一隻蛋畀另一佳麗食。」

考慮下屆再參賽

原來大熱黃婉恩（Yancy）跟蔡頌思是朋友，但不熟落，初選時才再見。有否看好哪一位佳麗及若繼續參賽有否信心入圍？蔡頌思以官腔口吻說：「每個入圍佳麗都靚，好難揀。」談到26歲才參選似乎較遲，但她笑謂：「一啲都唔遲，我覺得今年心態成熟先ready。可能係命運，因疫情冇工作；咁啱又識啲港姐嘅朋友，咁啱又到報名時間，突然諗自己好似準備好做呢件事。」明年27歲是最後一年參加港姐，會否再參選？她不諱言若時機合適會考慮再選。

蔡頌思為參賽努力減肥，不過她開始時並非為參選，結果成功由104磅減了10磅，她為減肥還參加了一個與別不同的跑步group：「係發哥嘅running team，達Ming（張達明）叫我join，我係逢星期三朝早7點半開始跑5至7公里。」蔡頌思指發哥除了是領隊，更指導她跑步姿勢及方法：「之前有套戲係講跑步，我有去練過，但點知原來我個跑步方式唔啱，發哥好認真同有耐心教我，有次我攞支水去跑，發哥叫我放低，佢話只要跑得啱就唔會口渴，結果我真係唔需要支水。」她自言是跑步group的新成員，開始約兩個月，暫時從未試過「走堂」。

跟發哥跑步，蔡頌思從中體會他的堅毅；亦了解藝人成功非僥倖的道理：「啲人成日話睇唔到藝人有幾努力，但見到發哥佢哋咁成功真係有原因。我一星期只join一次，但佢哋幾乎日日跑，風雨不改，我體驗到呢樣嘢，想似佢哋咁成功就要堅持。」她亦有向發哥道出為何自己愛上演戲：「我細個好怕醜唔講嘢，媽咪就『掟』我去戲劇班，發現以往係防衞意識保護自己，但演戲唔係代表自己，有安全感，所以可以盡情發揮，透過表演搵返自信心。」發哥輕輕送上一句：「加油。」已為她打下強心針。

《散後》遭禁因素多

《散後》是蔡頌思首部參演電影，可惜因內容涉及社會運動香港的戲院都不敢上映，會否感到可惜？她說：「拍呢套戲好開心，因導演在開拍前要我哋每日上七個鐘嘅acting堂，好深刻。喺電影世界有好多因素影響一套電影上唔上到同有冇人睇，對我嚟講係寶貴經歷，況且套戲參加過獨立電影節，又參加過大阪電影節，分享過畀世界各地嘅人睇，我好滿足；冇可惜，係一個經歷回憶。」但有傳因參演過此戲而影響入圍港姐，蔡頌思強調絕無此事。目前單身的她談到擇偶條件：「我特別鍾意啲好陽光同笑得好睇嘅男仔。」40億千金的擇偶條件竟如此貼地簡單。

場地提供：M2 Home（皇室堡）

Let's block ads! (Why?)